डेङ्गीबाट कोशी प्रदेशमा मात्रै १४ जनाको मृत्यु, २२ हजारभन्दा धेरै सङ्क्रमित

काठमाडौं– कोशी प्रदेशमा अहिलेसम्म डेङ्गी सङ्क्रमणबाट १४ जनाले ज्यान गुमाएका छन् । २२ हजार दुई सय ३७ जना सङ्क्रमित भएका छन् ।

डेङ्गीबाट सबैभन्दा धेरै सुनसरी जिल्ला प्रभावित छ । सुनसरीमा मात्रै १२ जनाले ज्यान गुमाएका प्रदेश स्वास्थ्य निर्देशनालय धनकुटाका जनस्वास्थ्य अधिकृत विवेचना चम्लागाईँले जानकारी दिइन् । उनका अनुसार सुनसरीमा मात्रै झण्डै १६ हजार जना सङ्क्रमित भएका छन् ।

कोशी प्रदेशको सुनसरीसहित १४ वटै जिल्लामा डेङ्गीको सङ्क्रमण फैलिएको छ । उनका अनुसार मोरङमा तीन हजार तीन सय ६३ सङ्क्रमित हुँदा एक जनाको ज्यान गएको छ । झापामा एक हजार चार सय २० सङ्क्रमित छन् ।

झापामा पनि एक जनाको ज्यान गएको तथ्याङ्क छ । देशका ७५ वटा जिल्लामा डेङ्गी फैलिएको छ ।

स्वास्थ्य मन्त्रालयको इपिडिमियोलोजी तथा रोग नियन्त्रण महाशाखाका अनुसार कर्णालीको मुगु र हुम्लामा यसवर्ष डेङ्गीको सङ्क्रमण भेटिएको छैन ।