विजयकुमार गच्छदार विशेष अदालतमा हाजिर : थुनछेकको प्रक्रिया अघि बढ्ने

३० असार,काठमाण्डौ – नेपाली कांग्रेसका नेता विजयकुमार गच्छदार विशेष अदालतमा हाजिर भएका छन् ।

अदालत स्रोतका अनुसार आज विशेष अदालतमा उपस्थित भएको बताइएको छ । भ्रष्टाचार अभियोगमा अख्तियार दुरुपयोग अनुसन्धान आयोगको टोलीले गच्छदारविरुद्ध विशेष अदालतमा मुद्दा दर्ता गरेको थियो ।

बालुवाटारको ललिता निवास प्रकरणमा सरकारी जग्गा व्यक्तिको नाममा बनाएको अभियोगमा २०७६ माघ २२ गते विशेष अदालतमा मुद्दा दर्ता भएको थियो । गच्छदारसँगै १ सय ७५ जना विरुद्ध अदालतमा मुद्दा दर्ता भएको थियो ।

अदालतले गच्छदारविरुद्ध पछिल्लो पटक जारी गरेको ३० दिनको म्याद सकिएको थियो । गच्छदार अदालतमा हाजिर भएपछि अब थुनछेकको प्रक्रिया अघि बढ्नेछ ।