बाघको आक्रमणबाट चितवनमा एक ज्यान गयो

१० असोज चितवन – चितवनमा बाघको आक्रमणबाट एक पुरुषको मृत्यु भएको छ ।

घाँस काट्नका लागी निकुञ्जको जंगल गएका भरतपुर महानगरपालिका– १३ का ६३ वर्षीय जन्हु महतो, चौधरीको बाघको आक्रमणबाट शनिबार बिहान मृत्यु भएको प्रहरीले जनाएको छ ।

चितवन राष्ट्रिय निकुञ्जका सूचना अधिकारी अशोक रामका अनुसार स्थानीय बेलशहर मध्यवर्ती सामुदायिक वनमा घाँस काट्न गएका चौधरीलाई बिहान १०ः१५ बजे बाघले आक्रमण गरेको थियो ।

अहिले पनि बाघ र शव एकै ठाउँमा रहेकाले बाघलाई डार्ट गरेर शव नियन्त्रणमा लिने प्रयास भइरहेको छ । इलाका प्रहरी कार्यालय गीतानगर र स्थानीय सो स्थानमा जाँदै गरेको जिल्ला प्रहरी कार्यालय चितवनका प्रवक्ता डीएसपी सूर्य थापाले बताए ।