सांसद मेटमणि चौधरीविरुद्धको चेक अनादरको जाहेरी फिर्ता

बुटवल – एकीकृत नेकपा समाजवादीका सांसद तथा प्रतिनिधिसभाका प्रमुख सचेतक मेटमणि चौधरीविरुद्ध गरिएको चेक अनादरको जाहेरी फिर्ता गरिएको छ। जिल्ला प्रहरी कार्यालय दाङमा साउन ६ गते परेको उक्त उजुरी आइतबार फिर्ता गरिएको हो।

चौधरीले रोल्पाका धात बुढामगरलाई ५ करोड ४० लाख रुपैयाँ बराबरको चेक दिएको तर तीनपटकसम्म चेक नसाटिएपछि बुढामगरले बैकिङ कसुरसम्बन्धी मुद्दा अघि बढाएका थिए। उनले एभरेस्ट बैंकबाट काटिएको चेकमा चौधरीको हस्ताक्षर फरक परेको भन्दै प्रहरीसमक्ष उजुरी गरेका थिए।

तर आइतबार दिउँसो हुलाकमार्फत जिल्ला प्रहरी कार्यालय दाङमा उजुरी फिर्ताको पत्र प्राप्त भएको प्रहरीले पुष्टि गरेको छ। उक्त मुद्दा अगाडि बढाउने क्रममा प्रहरीले उजुरीकर्तालाई रकमको स्रोत प्रमाणित गर्न पटक–पटक ताकेता गरेको थियो। तर बुढामगर प्रहरीसमक्ष नपुगेपछि अनुसन्धानमा जटिलता थपिएको थियो। यद्यपि, प्रहरी कानुनी परामर्शमा जुटिरहेको अवस्थामा जाहेरी फिर्ता भएपछि अनुसन्धान प्रक्रियाले नयाँ मोड लिएको हो।

चौधरीले हस्ताक्षर गरेको भनिएको चेक २०८१ पुस २६ गतेको मितिमा एभरेस्ट बैंकको खाताबाट जारी गरिएको थियो। चेकमा हस्ताक्षर मिल्दैन भन्दै तीनपटक चेक अस्वीकृत भएपछि बुढामगरले बैंकिङ ऐनअनुसार सात दिनभित्र कारवाही प्रक्रियाका लागि सूचना निकाल्न निवेदन दिएका थिए।

उजुरी फिर्ताले चौधरीलाई राहत

जाहेरी फिर्ता भएपछि चौधरीमाथिको सीधा कानुनी कारवाहीको सम्भावना तत्कालका लागि टरेको छ। यसले राजनीतिक वृत्तमा समेत तरंग ल्याएको छ। चौधरी प्रतिनिधिसभामा प्रमुख सचेतक रहेका र सत्तारूढ गठबन्धनका प्रभावशाली नेतामध्ये एक मानिन्छन्।

हालको घटनाले चेक बाउन्ससम्बन्धी मुद्दा, राजनीतिक व्यक्तिहरूको आर्थिक लेनदेन, र प्रहरी अनुसन्धान प्रक्रियाको पारदर्शितामाथि समेत प्रश्न उठाउने गरी सार्वजनिक चासो बढाएको छ।