सिन्धुपाल्चोकमा बाढी पहिरोका कारण अरनिको राजमार्ग अवरुद्ध

काठमाडौं – सिन्धुपाल्चोकमा बाढी र पहिरोका कारण अरनिको राजमार्ग पूर्णरुपमा अवरुद्ध भएको छ ।

हिजो सोमबार रातिको वर्षाका कारण भोटेकोशी गाउँपालिकाको तीन ठाउँमा पहिरो जाँदा राजमार्ग पूर्ण रुपमा बन्द भएको सिन्धुपाल्चोक प्रहरीले जनाएको छ ।

गाउँपालिकाको वडा नम्बर २ को कोदारी, ३ को लार्चा र २ कै कोप्लाङमा पहिरो गएको छ । खोलाहरूमा बाढी आएको छ । पहिरो पन्छाउने काम जारी रहेकोले राजमार्ग पूर्ण रुपमै बन्द भएको प्रहरीले जनाउको छ । सडक बन्द भएपछि यात्रु मर्कामा परेका छन् । सवारीसाधनहरु सडकमै लाइन लागेका छन् ।

सोमबारदेखिको वर्षाका कारण देशका अन्य मुख्य सडकहरु पनि अवरुद्ध भएका छन् । कान्तिलोकपथ अन्र्तगतको ललितपुर, पूर्वपश्चिम राजमार्गअन्तर्गत बिनयी खोला र गुल्मीस्थित कालिगण्डकी करिडोर पनि अवरुद्ध भएको छ ।

सडक विभागका अनुसार सबैतिरका सडक खुलाउने प्रयास जारी छ ।