ट्रम्प प्रशासनद्वारा हार्वर्डको विदेशी विद्यार्थी भर्ना अधिकार रद्द

न्युयोर्क – अमेरिकी राष्ट्रपति डोनाल्ड ट्रम्पको प्रशासनले हार्वर्ड विश्वविद्यालयलाई विदेशी विद्यार्थी भर्ना गर्ने अधिकार रद्द गरेको छ। गृहमन्त्री क्रिस्टी नोएमको हस्ताक्षर रहेको पत्रमार्फत ‘सेभिस’ (विद्यार्थी र आदानप्रदान आगन्तुक कार्यक्रम) प्रमाणीकरण तुरुन्त प्रभावकारी रूपमा रद्द गरिएको घोषणा गरिएको हो।

यो निर्णयपछि हार्वर्ड विश्वविद्यालय र संघीय सरकारबीचको टकराव झनै चर्किएको छ। विश्वविद्यालयले यस कदमलाई गैरकानूनी र बदनियतपूर्ण प्रतिशोधको रूपमा व्याख्या गर्दै न्यायालयमा चुनौती दिएको छ।

हार्वर्डले एक वक्तव्य जारी गर्दै भनेको छ, “हामी हाम्रा अन्तर्राष्ट्रिय विद्यार्थी र विद्वानहरूलाई आतिथ्य गर्न प्रतिबद्ध छौँ। यो निर्णयले हार्वर्ड समुदाय, क्याम्पस वातावरण र अमेरिकी उच्च शिक्षाको अन्तर्राष्ट्रिय छविमा गम्भीर असर पार्न सक्छ।”

हार्वर्डले विदेशी विद्यार्थीहरूप्रति सहानुभूति, विविधता, समावेशीता र प्रगतिशील दृष्टिकोणलाई अगाडि बढाउँदा ट्रम्प प्रशासनले यसलाई ‘जागृत उदार विचारधारा’को गढ भनेको थियो। ट्रम्प आफैं विगतदेखि नै हार्वर्डप्रति आलोचनात्मक रहेकामा यो कदमलाई राजनीतिक प्रतिशोधको निरन्तरताका रूपमा लिइएको छ।

गृहमन्त्री नोएमको पत्रमा भनिएको छ, “विदेशी विद्यार्थी भर्ना गर्नु विशेषाधिकार हो, जसको लागि संस्थाले गृह मन्त्रालयका मापदण्डहरू पालना गर्नुपर्छ। हार्वर्डले रिपोर्टिङको अनिवार्यता नमान्दा यो अधिकार खोसिएको हो।”

उक्त पत्रमा हार्वर्डले यहुदी विद्यार्थीहरूका लागि असुरक्षित वातावरण बनाएको, हमासप्रति सहानुभूति देखाएको र विवादास्पद विविधता नीतिहरू अपनाएको आरोपसमेत लगाइएको छ।

हार्वर्डमा अध्ययनरत विद्यार्थीहरूमा यो निर्णयले अस्पष्टता र त्रास उत्पन्न गरेको छ। चौथो वर्षकी अमेरिकी विद्यार्थी एलिस गोयरका अनुसार, “हामीलाई अचानक यो समाचार थाहा भयो। धेरै अन्तर्राष्ट्रिय साथीहरूबाट सन्देशहरू आइरहेका छन्। सबै चिन्तित छन् र अन्योलमा परेका छन्।”

हार्वर्डमा हाल विदेशी विद्यार्थीको संख्या कुल भर्नाको २७ प्रतिशतभन्दा बढी रहेको तथ्यांकले देखाउँछ।

हार्वर्डले यस निर्णयविरुद्ध तत्काल कानूनी प्रक्रिया सुरु गर्ने जनाएको छ। विश्वविद्यालयले स्पष्ट रूपमा उल्लेख गरेको छ कि यो कदमले न केवल हार्वर्डको शैक्षिक स्वतन्त्रता, अनुसन्धान कार्य र अन्तर्राष्ट्रिय प्रतिष्ठामा असर पार्छ, तर अमेरिकी उच्च शिक्षाको नैतिक मूल्यमान्यतालाई पनि कमजोर बनाउँछ।

यो घटनाक्रमले अमेरिकामा विदेशी विद्यार्थीहरूप्रति बदलिँदो नीति र राजनीतिक ध्रुवीकरणले शिक्षाक्षेत्रलाई कसरी प्रभावित पारिरहेको छ भन्ने कुरालाई थप उजागर गरेको छ।