देउवाको भनाइ भनी फैलाइएका भ्रामक समाचारप्रति काँग्रेसको खण्डन

काठमाडौं – नेपाली काँग्रेसले पार्टी सभापति शेरबहादुर देउवाको नाम जोड्दै राजसंस्थाबारे सामाजिक तथा सञ्चारमाध्यममा फैलाइएका भ्रामक र कपोलकल्पित समाचारको कडा निन्दा र भत्र्सना गरेको छ। बिहीबार एक विज्ञप्ति जारी गर्दै काँग्रेसले यस्ता समाचार सम्प्रेषणलाई अनैतिक र आपत्तिजनक कार्यको संज्ञा दिएको छ।

विज्ञप्तिमा उल्लेख गरिएअनुसार, केही व्यक्तिहरूले क्षणिक स्वार्थ पूर्तिका लागि देउवाले नबोलेको, नभनेको र नसोचेको कुरालाई उनकै भनाइका रूपमा गलत ढङ्गले प्रचार गरी आमसञ्चारमाध्यमको दुरुपयोग गरिरहेका छन्। पार्टीले यस प्रकारका मनगढन्ते प्रचारहरूले पत्रकारिताको मर्म र नैतिकतालाई कमजोर बनाउने उल्लेख गरेको छ।

नेपाली काँग्रेसका मुख्यसचिव कृष्णप्रसाद पौडेलले जानकारी गराउँदै भने, “पार्टी आन्दोलनबाट प्राप्त उपलब्धिहरूको रक्षा गर्न प्रतिबद्ध छ र यस्ता भ्रामक समाचारहरू प्रति विश्वास नगर्न आम नागरिकलाई आग्रह गर्दछ।”

काँग्रेसले यस्ता क्रियाकलापले लोकतान्त्रिक मूल्य, जनताको मतप्रति सम्मान र पत्रकारिताको स्वतन्त्रतालाई नै क्षति पु-याउने भएकाले सर्वसाधारण तथा सञ्चारकर्मीहरूले सत्य सूचना सम्प्रेषणमा सजग रहनुपर्ने पनि स्पष्ट पारेको छ।

विज्ञप्तिमा पुनः दोहोर्याउँदै भनिएको छ, “सञ्चारमाध्यमको विश्वसनीयता जोगाउन तथा सामाजिक सद्भाव कायम राख्न यस्ता भ्रामक सूचनालाई बहिष्कार गर्नु अहिलेको आवश्यकता हो।”

यसअघि देउवाले राजसंस्थाबारे कुनै पनि अभिव्यक्ति नदिएको पार्टीले स्पष्ट पारेको छ। यस्तो अवस्थामा उनको भनाइ भन्दै झूटा र आधारहीन समाचार प्रकाशित हुनु गम्भीर षड्यन्त्रको हिस्सा हुन सक्ने आशङ्का काँग्रेसले व्यक्त गरेको छ।

पार्टीले पत्रकार महासंघ तथा सम्बन्धित निकायहरूसँग यस्ता असत्य समाचारको निगरानी गर्न र आवश्यक कारबाही प्रक्रिया अघि बढाउन समेत अनुरोध गरेको छ।