दक्षिण अफ्रिकालाई ट्रम्पको चेतावनीपूर्ण आरोप

वासिङ्टन – अमेरिकी राष्ट्रपति डोनाल्ड ट्रम्पले दक्षिण अफ्रिकाका राष्ट्रपति सिरिल रामाफोसामाथि श्वेत मानिसहरूविरुद्ध “नरसंहार” गरिरहेको आरोप लगाएका छन्। उनले ओभल अफिसमा पत्रकारहरूको उपस्थितिमा एक भिडियो प्रदर्शन गर्दै दक्षिण अफ्रिकामा श्वेत किसानहरू लक्षित हिंसा भइरेको दाबी गरेका हुन्।

ट्रम्पले सार्वजनिक रूपमा दक्षिण अफ्रिकी सरकार र रामाफोसाको आलोचना गर्दै भने, “तपाईंले उनीहरूलाई जमिन लिन अनुमति दिनुहुन्छ र त्यसपछि जब उनीहरूले जमिन लिन्छन्, उनीहरूले श्वेत किसानलाई मार्छन्, र केही हुँदैन।”

उनका अनुसार, यो प्रक्रिया श्वेत किसानहरूलाई अफ्नो देश छोडेर अमेरिका भाग्न बाध्य पार्ने खालको छ। उनले देखाएको चार मिनेट लामो भिडियोमा कथित रूपमा अश्वेत राजनीतिज्ञहरूले श्वेतहरूविरुद्ध विभेद र हिंसा गर्न आह्वान गरेको देखाइएको थियो। यद्यपि, उक्त भिडियो क्लिपहरूमा केही भ्रमपूर्ण सामग्री पनि रहेको देखिएको छ, जसमध्ये एउटा क्लिपमा प्रजातान्त्रिक गणतन्त्र कंगोको दृश्य देखिएको थियो, जुन ट्रम्पले दक्षिण अफ्रिकाको दाबी गरेका थिए।

ट्रम्पको यस्तो व्यवहारले सामान्यतया कूटनीतिक सतर्कता रहने ओभल अफिसलाई विवादास्पद आरोप र भावनात्मक उत्तेजनाको मञ्चमा परिणत गराएको धेरै विश्लेषकहरू बताउँछन्। उनले श्वेत किसानहरूको पक्षमा उभिएर दक्षिण अफ्रिकाको आन्तरिक भूमि पुनःवितरण नीतिलाई शंकाको नजरले प्रस्तुत गरेका छन्।

ट्रम्प प्रशासनले हालै मात्र ५० भन्दा बढी दक्षिण अफ्रिकी श्वेत नागरिकलाई शरणार्थी दर्जा दिएको छ। यो निर्णयले ट्रम्प प्रशासनको समग्र शरणार्थी नीति—जहाँ अधिकांश क्षेत्रहरूबाट आप्रवासी आगमन बन्द गरिएको छ—संग द्वैध मापदण्ड देखिएको विश्लेषकहरूको टिप्पणी रहेको छ।

दक्षिण अफ्रिकी राष्ट्रपति सिरिल रामाफोसाले ट्रम्पको आरोपलाई कडा शब्दमा अस्वीकार गरेका छन्। उनले श्वेत समुदायको नरसंहार भइरेको भन्ने दाबी आधारहीन, अतिरञ्जित र द्वेषपूर्ण भएको बताएका छन्। रामाफोसा पहिलोपटक यस्तो आरोप सुन्दा स्तब्ध भए पनि उनले संयमता अपनाउँदै त्यसलाई खारेज गरेका छन्।

यो विवाद ट्रम्पको कूटनीतिक दृष्टिकोण र अन्तर्राष्ट्रिय सम्बन्धहरूमा हस्तक्षेप गर्ने शैलीप्रति थप आलोचना उत्पन्न गराउने देखिएको छ।

डोनाल्ड ट्रम्पको यस्तो आरोपले केवल दक्षिण अफ्रिका र अमेरिकाबीचको सम्बन्धमा तनाव सिर्जना गर्न सक्ने सम्भावना मात्र होइन, अन्तर्राष्ट्रिय कूटनीतिक आचारसंहितामा पनि प्रश्न उठाएको छ। तथ्य परिक्षण बिना प्रस्तुत गरिएको भिडियो, विभेदकारी शरणार्थी नीति, र अनावश्यक सार्वजनिक आरोपहरूले ट्रम्पको व्यवहारप्रति गम्भीर बहस सुरु गराएको छ।