श्रीअन्तुमा राष्ट्रिय चलचित्र पत्रकार सम्मेलन सुरु, पत्रकारहरू सम्मानित

इलाम – चलचित्र पत्रकार संघ नेपालको २६ औं वार्षिकोत्सव तथा दोस्रो राष्ट्रिय भेला बुधबारदेखि इलामको पर्यटकीय स्थल श्रीअन्तुमा सुरु भएको छ। भव्य कार्यक्रमको आयोजना गर्दै पहिलो दिन “सिनेमा संवाद” र “मिडियामा मन्थन” जस्ता विषयमा विचार–विमर्श गरिएको छ।

कार्यक्रमको अवसरमा चलचित्र पत्रकारिता क्षेत्रमा उल्लेखनीय योगदान दिएका पत्रकारहरूलाई सम्मान तथा पुरस्कार प्रदान गरिएको छ। पत्रकार ध्रुव लम्साललाई ‘राष्ट्रिय चलचित्र पत्रकारिता रजत सम्मान २०८२’ प्रदान गरिएको छ भने विष्णु सुवेदीलाई ‘राष्ट्रिय चलचित्र पत्रकारिता सम्मान’ बाट सम्मानित गरिएको छ।

त्यस्तै, नरेन्द्र बस्नेतले ‘कोशी राष्ट्रिय चलचित्र पत्रकारिता सम्मान’ प्राप्त गरेका छन्। विभिन्न विधामा पुरस्कार पाउने अन्य पत्रकारहरूमा जीवनकुमार पराजुली र वर्षा बस्नेत छन्, जसले ‘राष्ट्रिय चलचित्र पत्रकारिता पुरस्कार’ प्राप्त गरे।

रश्मी थापालाई ‘राष्ट्रिय चलचित्र पत्रकारिता प्रोत्साहन पुरस्कार’ र तुलसी निरौलालाई ‘कोशी राष्ट्रिय मोफसल चलचित्र पत्रकारिता पुरस्कार’ प्रदान गरिएको छ।

कार्यक्रम आगामी जेठ ९ गतेसम्म चल्नेछ। यस राष्ट्रिय भेलामा देशभरका चलचित्र पत्रकारहरूको व्यापक सहभागिता रहेको छ। भेलामा चलचित्र पत्रकारिताको वर्तमान अवस्था, चुनौती र आगामी सम्भावनाबारे गम्भीर छलफल गरिने बताइएको छ।

चलचित्र पत्रकार संघ नेपालले यस कार्यक्रममार्फत चलचित्र पत्रकारितामा क्रियाशील व्यक्तिहरूलाई सम्मान गर्दै पत्रकारिता क्षेत्रको विकासमा योगदान पु¥याउने उद्देश्य राखेको छ। आयोजकहरूले चलचित्र र सञ्चार क्षेत्रको सम्बन्धलाई अझ सुदृढ बनाउने प्रयासस्वरूप यस्तो राष्ट्रिय भेला सञ्चालन गरिएको बताएका छन्।

यस कार्यक्रमले स्थानीय पर्यटन प्रवर्द्धनमा समेत सहयोग पुर्‍याउने अपेक्षा गरिएको छ, किनभने श्रीअन्तुमा आयोजित यस किसिमको राष्ट्रिय स्तरको कार्यक्रमले देशभरका प्रतिनिधिहरूलाई एकै ठाउँमा ल्याएको छ।