राप्ती राजमार्गको स्तरोन्नती गर्न सांसद ज्वालाको माग

काठमाडौं – नेकपा (एकीकृत समावाजदी)का उपाध्यक्ष प्रकाश ज्वालाले राप्ती राजमार्गको स्तरोन्नतीका लागी पर्याप्त बजेट विनियोजन गर्न प्रधानमन्त्रीसमक्ष आग्रह गरेका छन्।

आज प्रधानमन्त्री केपी शर्मा ओलीसमक्ष ध्यानाकर्षण पत्र पेश गर्दै सांसद ज्वालाले राप्ती राजमार्ग सल्यान जिल्लाको मात्र नभई रुकुम पश्चिम, रोल्पा, जाजरकोट, डोल्पा लगायतका कर्णाली प्रदेशका जिल्लाहरुको समेत जीवनरेखा भएको उल्लेख गरेका छन्। राजमार्गको केही खण्ड स्तरोन्नति भए पनि धेरैजसो भाग जीर्ण अवस्थामा पुगेको र नियमित मर्मत अभावका कारण यातायात सञ्चालनमा कठिनाइ भइरहेको उनले बताएका छन्।

दैनिक उपभोग्य वस्तु तथा कृषि उपजको ढुवानीमा समेत समस्या उत्पन्न भइरहेको भन्दै सांसद ज्वालाले आगामी आर्थिक वर्ष २०८२/८३ को बजेटमा राप्ती राजमार्गको मर्मत सम्भार र स्तरोन्नतिको लागि कम्तीमा एक अर्ब रुपैयाँ विनियोजन गर्न जोडदार माग गरेका छन्।

यसैगरी, सांसद ज्वालाले कर्णाली र लुम्बिनी प्रदेशलाई जोड्ने रणनीतिक महत्वको कालीमाटी घुइयाबारी चरपारी कोहलपुर अन्तर प्रदेश सडक अन्तर्गत पर्ने मदन भण्डारी राजमार्गको बाँकी खण्ड (श्रीनगर खलंगा जैतपानी बालुवासंग्रह) कालोपत्रेको लागि पनि तत्काल टेन्डर आह्वान गरी काम अगाडि बढाउनुपर्ने माग गरेका छन्। उक्त खण्डको कालोपत्रेको लागि आगामी आर्थिक वर्षको बजेटमा ५० करोड रुपैयाँ विनियोजन गर्न उनले विशेष अनुरोध गरेका छन्।

सांसद ज्वालाले दुवै महत्वपूर्ण राजमार्गको स्तरोन्नति र समयमै सम्पन्न गर्ने विषयमा सरकारले गम्भीरतापूर्वक ध्यान दिने विश्वास गरेका छन्।