अविरल वर्षा प्रभाव : तीन राजमार्ग अवरूद्ध , १९ स्थानमा एकतर्फी सडक सञ्चालन

काठमाडौं– अविरल वर्षापछि आएको बाढी–पहिरोका कारण तीनवटा राजमार्ग पूर्णरूपमा अवरूद्ध बनेका छन् ।

सडक विभागकाअनुसार चतरा–मुलघाट–माझीटार–अमरापुरडाँडा–गणेशचोक जोड्ने तमोर करिडोर अन्तर्गतको सडक माझिटार, हेवाखोलामा अवरूद्ध छ ।

त्यस्तै भालुवाङ लिवाङ रोल्पा माडीचौर दारबोट जोड्ने सडक प्युठानको खहरे खोलामा र गर्जेनीमा अवरूद्ध रहेको छ ।

यस्तै, बेलहिया–भैरहवा–बुटवल–बर्तुङ–राम्दी–स्याङ्जा–पोखरा जोड्ने सिद्धार्थ राजमार्गअन्तर्गतको सडक पाल्पाको ६ स्थानमा अवरूद्ध भएको सडक विभागले जानकारी दिएको छ ।

यसवर्ष मनसुन सुरू भएयता ११४ स्थानमा सडक अवरूद्ध भएको विभागले जानकारी दिएको छ । त्यसमध्ये ३ राजमार्ग ८ ठाउँमा अवरूद्धको अवस्थामा छन् । १९ स्थानमा एकतर्फी सञ्चालनमा छन् । ८७ स्थानमा दुवैतर्फ चालु रहेको विभागको भनाइ छ ।