२०८२ अषाढ ९, सोमबार

भुटानी शरणार्थी प्रकरणमा धरौटीमा छुटेका केशव तुलाधर ललिता निवास प्रकरणमा पुनः पक्राउ

न्युज डेस्कप्रकाशित मिति: २०८० श्रावण १, सोमबार (१ साल अघि)

१९२ पाठक संख्या

काठमाडौं– नक्कली भुटानी शरणार्थी प्रकरणमा असार २८ गते पक्राउ परेर हिजो जिल्ला अदालत काठमाडौंको आदेशमा रिहा भएका केशव तुलाधर पुनः पक्राउ परेका छन् ।

ललिता निवासको सरकारी जग्गा हिनामिना प्रकरणमा काठमाडौं असनका तुलाधरको संलग्नता देखिएका कारण पक्राउ गरिएको जिल्ला प्रहरी परिसर काठमाडौंका प्रमुख तथा प्रहरी वरिष्ठ उपरीक्षक दानबहादुर कार्कीले बताए ।

भुटानी शरणार्थी प्रकरणमा पक्राउ परेका तुलाधर हिजो १५ लाख रुपैयाँ धरौटीमा छुटेका थिए ।

पक्राउ परेका तुलाधरलाई अहिले जिल्ला प्रहरी परिसर काठमाडौंमै राखिएको र आज केन्द्रीय अनुसन्धान ब्युरो (सीआईबी) लाई आवश्यक अनुसन्धानका लागि बुझाइने प्रमुख तथा प्रहरी वरिष्ठ उपरीक्षक कार्कीले जानकारी दिए ।

नक्कली भुटानी शरणार्थी प्रकरणमा फरार रहेका भन्दै यही असार २८ गते उनलाई काठमाडौं उपत्यका अनुसन्धान कार्यालयको टोलीले काठमाडौंको सानो भर्याङबाट पक्राउ गरेको थियो ।