नेपाल पाकिस्तान ‘ए’सँग ४ विकेटले पराजित

काठमाडौं– श्रीलंकामा जारी एसीसी इमर्जिङ टिम्स एसिया कपअन्तर्गत पहिलो खेलमा नेपाल पाकिस्तान ‘ए’सँग ४ विकेटले पराजित भएको छ ।

नेपालले दिएको १८० रनको लक्ष्य पाकिस्तान ‘ए’ले ३२.५ ओभरमा ६ विकेट गुमाएर पूरा गरेको हो । नेपालका ललितनारायण राजवंशीले ३, पवन सर्राफले २ र कुशल मल्लले एक विकेट लिए ।

टस जितेर पहिला ब्याटिङ गरेको नेपालले ३७ ओभरमा सबै विकेट गुमाएर १७९ रन बनाएको थियो । नेपालका लागि सोमपाल कामीले सर्वाधिक ७५ रन बनाए ।

प्रतिश जिसीले पनि २६ रन बनाउँदा नेपालका कुशल भुर्तेलले १, मोहम्मद आसिफ शेखले १२, अर्जुन साउदले १७, रोहित पौडेलले ७ र पवन सर्राफले १ रन जोडे ।

कुशल मल्लले १७ र गुल्सन झाले १३ रन बनाए । भीम सार्कीले खाता खोल्न सकेनन् । कुशल मल्ल र गुल्सन झाबीच सातौं विकेटका लागि २८ रनको साझेदारी गरेका थिए ।

नेपालले समूहको दोस्रो खेलमा सोमबार भारत ‘ए’सँग प्रतिस्पर्धा गर्ने छ ।