आरजुलाई पैसा दिएको भन्ने आवाज शरणार्थी प्रकरणमा थुनामा रहेका शर्माकै भएको पुष्टि

काठमाडौं– नक्कली भुटानी शरणार्थी प्रकरणमा नेपाली कांग्रेसकी केन्द्रीय सदस्य एवम् सांसद डा. आरजु राणाले पैसा लिएको दाबी गरिएको अडियो शरणार्थी प्रकरणका प्रतिवादी सन्देश शर्माकै भएको पुष्टि भएको छ ।

प्रहरी प्रधान कार्यालयले अडियोमा बोल्ने व्यक्ति सन्देश शर्मा नै भएको बताएको हो । दाङका शर्मा शरणार्थी प्रकरणमा पक्राउ परेर अनुसन्धानका लागि थुनामा छन् ।

आफ्नो नाम जोडेर बदनियत पूर्ण ढंगबाट फेक अडियो बनाएर बदनाम गराउन खोजेको भन्दै राणाले दोषीलाई कारबाही माग गर्दै साइबर ब्यूरोमा निवेदन दिएकी थिइन् ।
आरजुकै निवेदनमाथि अनुसन्धान गर्दा उक्त अडियो शर्माको आवाजसँग मिलेको हो ।

अडियो टिकटकमा पहिलो पटक कहाँ र कसले राखेको भन्ने बारेमा टिकटक सिंगापुरसँग जानकारी माग गरेकोमा हालसम्म प्राप्त हुन नसकेको नेपाल प्रहरीका प्रवक्ता कुवेर कडायतले बताए ।