तिनाउ नदीमा जलसतह खतराको विन्दुभन्दा माथिः नदी आसपासका बस्तीका बासिन्दालाई सतर्क रहन आग्रह

काठमाडौं– रुपन्देहीको तिनाउ नदीमा आएको बाढीले खतराको जल सतह पार गरेपछि नदी आसपासका बस्तीका बासिन्दालाई सतर्क रहन भनिएको छ ।

सोमबार रातीदेखि पाल्पा, रुपन्देहीलगायत जिल्लामा निरन्तर वर्षा भएकाले नदीमा जलसतह उच्च भएपछि रुपन्देही जिल्ला प्रशासन कार्यालयले जिल्लाका सबै स्थानीय तहलाई सतर्कता अपनाउन निर्देशन दिएको हो ।

आज बिहान ४ बजे नदीमा जल सतह खतराको विन्दुभन्दा माथि पुगेको थियो । बुटवलस्थित बाढी मापन केन्द्रका अनुसार तिनाउमा बिहान पानीको सतह ७ दशमलव २२ मिटर पुगेको छ ।

सो नदीमा ५ दशमलव ६ मिटर जल सतहलाई खतराको विन्दु मानिएको छ । पानी पर्ने क्रम जारी रहेकाले दिउँसोसम्म सतर्क रहन भनिएको हो । जिल्लास्थित तीन वटै सुरक्षा निकायलाई पनि तयारी अवस्थामा रहन पनि निर्देशन दिइएको छ ।