जिल्ला अदालत ललितपुर अगाडि कानुन व्यवसायीको प्रदर्शन, कामकाज प्रभावित

काठमाडौं– कानुन व्यवसायीहरूले जिल्ला अदालत ललितपुर अगाडि प्रदर्शन गरेका छन् । प्रदर्शनका कारण अदालतको कामकाज प्रभावित भएको छ ।

गएको असार १३ गते ललितपुर जिल्ला अदालतमा कार्यरत नायब सुब्बा प्रेमिका तामाङमाथि कानुन व्यवसायी अमिर लामिछानेले हातपात गरेका थिए । हातपात गर्ने अधिवक्ता लामिछानेविरुद्ध अभद्र व्यवहारमा मुद्दा चलाउने प्रक्रिया अघि बढेको छ । अधिवक्ता लामिछानेलाई हिजो आइतवार पक्राउ गरेकोमा साधारण तारेखमा छाडिएको छ ।

लामिछानेको पक्राउ र मुद्दा चलाउने प्रक्रियाका विरुद्ध नेपाल बार एसोसिएशनको आह्वानमा कानुन व्यवसायीहरूले प्रदर्शन गरेका हुन् ।

नासु प्रेमिकाले आदेश हेर्न घुस मागेको भन्दै कानुन व्यवसायीहरूले आज देशभर बन्दी प्रत्यक्षीकरणबाहेकका मुद्दामा बहस पैरवी नगरि आन्दोलन गरिरहेका छन् ।