काठमाडौंसहित देशका धेरै ठाउँमा वर्षा : नदी आसपासका क्षेत्रमा सतर्कता अपनाउन आग्रह

काठमाडौं – काठमाडौं उपत्यकासहित देशका धेरै ठाउँमा आज  पानी परिरहेको छ ।

जल तथा मौसम पूर्वानुमान महाशाखाले लगातार परेको पानीले केहि ठाउँमा बाढीको जोखिम रहेको जनाएको छ । स्याङजा, दाङ, रुपन्देही, पाल्पा र नवलपुरमा बाढीको उच्च जोखिम रहेको बाढी पूर्वानुमान महाशाखाले जनाएको छ ।

ती जिल्ला भएर बग्ने खोलामा आकस्मिक बाढी तथा डुवान हुन सक्ने भएकाले नदी आसपासका क्षेत्रमा सतर्कता अपनाउन पनि बाढी पूर्वानुमान महाशाखाले अनुरोध गरेको छ ।

यस्तै आज इलाम, झापा, मोरङ, सुनसरी, मकवानपुर, चितवन, पर्सा, तनहुँ, गुल्मी, अर्घाखाँची, प्यूठान, कैलाली, कञ्चनपुर, डोटी, डडेलधुरा र आसपास भई बहने साना खोला तथा नदीमा पनि जोखिम रहेको महाशाखाले जनाएको छ ।