८४ रनले मलेसियालाई हराउँदै यू–१६ इस्ट जोन कपमा नेपाल समूह विजेता

काठमाडौं– एसिसी मेन्स यू–१६ इस्ट जोन कपमा नेपाल समूह विजेता बनेको छ । यसअघि नै सेमिफाइनलमा पुगेको नेपालले समूहको दोस्रो तथा अन्तिम खेलमा आयोजक मलेसियालाई ८४ रनले पराजित गर्न सफल भएको हो ।

तीन टिम रहेको समूह ‘ए’ मा थाइल्यान्ड लगातार दुई खेलमा पराजित भएपछि नेपाल र मलेसिया अन्तिम खेलअघि सेमिफाइनलमा पुगेका थिए ।

शुक्रबार नेपालले दिएको १८४ रनको लक्ष्य पछ्याएको मलेसिया ३०.५ ओभरमा ९९ रनमै अलआउट भयो। मलेसियाका लागि मोहमद आलिफले ५२ रन र मोहमद हाइरिलले ५४ रनको योगदान गरे ।

मलेसियालाई सय रन भन्दा कममा रोक्ने क्रममा नेपालका अशोक धामीले ४ विकेट लिए। उनले ७ ओभरमा १४ रन खर्चिए। अभिषेक तिवारीले ३ विकेट लिन सफल भए भने सन्तोष यादवले २ विकेट हात पारे ।

त्यसअघि टस जितेर पहिले ब्याटिङ गरेको नेपाल ३३.४ ओभरमा १८३ रनमा अलआउट भयो। नेपालका लागि अशोक धामीले ३६ बलमा ३ चौका र ५ छक्काको मद्दतमा ५२ रन जोडे ।

ओपनर सूर्यान्सु कोइराला र नरेश भट्टले २९–२९ रनको योगदान गरे। नेपालका ६ ब्याट्सम्यानले दोहोरो अंकमा रन बटुल्न सकेनन् ।

अब नेपालले सेमिफाइनलमा हङकङ वा सिंगापुर मध्ये एक टिमसँग भिड्नेछ ।