स्रोत नखुलेको ५३ लाख रूपैयाँसहित ७० वर्षीया वृद्धा पक्राउ

काठमाडौं– त्रिभुवन अन्तर्राष्ट्रिय विमानस्थलको आन्तरिक उडानतर्फको प्रस्थान ह्याण्ड व्यागेज चेकिङ एरियाबाट स्रोत नखुलेको तथा भन्सार उद्घोष नगरेको नेपाली रुपैयाँसहित एक वृद्धा पक्राउ परेकी छन् ।

पर्वत घर भएकी ७० वर्षीया बीबी कुमारी गुरुङलाई आइतबार दिउँसो ५३ लाख ८ हजार ५ सय रूपैयाँसहित प्रहरीले पक्राउ गरेको हो ।

बुद्ध एयरको उडानमा काठमाडौंबाट भैरहवा जान लागेकी गुरुङको त्रिभुवन अन्तर्राष्ट्रिय विमानस्थलको आन्तरिक उडानतर्फको प्रस्थान ह्याण्ड व्यागेज चेकिङ एरियाको एक्सरे मेसिनमा स्क्रिनिङ गर्ने क्रममा उनको साथमा रहेको झोलाभित्र उक्त नगद फेला परेको हो ।

उनलाई आवश्यक अनुसन्धान एवम् कारवाहीको लागि जिल्ला प्रहरी परिसर काठमाडौं टेकु पठाइएको छ ।