ई–सेवा सिकाईदिने भन्दै बैंकको पैसा चोर्ने पक्राउ

काठमाडौं– अनलाइन ठगी गर्ने कार्यमा संलग्न रहेको अभियोगमा प्रहरीले एकजना युवकलाई पक्राउ गरेको छ ।

दोलखा कालिन्चोक गाउँपालिका–७ घर भई काठमाडौं कागेश्वरी मनहरा नगरपालिका–६ मुलपानी बस्ने २२ वर्षीय अरूण सिवाकोटीलाई प्रहरीले पक्राउ गरेको छ ।

सिवाकोटीले पीडितसँग चिनजान गरी ई–सेवा तथा खल्ती वालेटहरुबाट हुने कारोबार तथा रकम ट्रान्सफर जस्ता कार्यहरु सिकाईदिने भन्दै फरक ब्यक्तिको फोटो राखी ईसेवा तथा खल्ती वालेटहरु खोली विभिन्न बहाना बनाई झुक्याई पीडितको बैंक खाता तथा मोबाइल बैंकिङमा पहुँच पु¥याई खाताबाट अन्यत्र बैंक खाता तथा वालेटहरुमा रकम ट्रान्सफर गरी अनलाईनमार्फत ठगी गर्ने कार्यमा संलग्न रहेको खुल्न आएपछि काठमाडौं उपत्यका अपराध अनुसन्धान कार्यालय मिनभवनबाट खटिएको प्रहरीले उनलाई पक्राउ गरेको हो ।

उनलाई ठगी सम्बन्धी कसूरमा आवश्यक अनुसन्धान एवं कारवाहीको लागि जिल्ला प्रहरी परिसर टेकु काठमाडौंमा पठाइएको छ ।