ठमेलमा युवतीको कुटपिट गरी हत्या

काठमाडौं– काठमाडौंमा एक जना युवतीको कुटपिट गरी हत्या भएको छ ।

काठमाडौं महानगरपालिका–२६ ठमेल भगवतीवहाल डेरा गरी बस्ने चितवन राप्ती नगरपालिका–७ घर भएकी २६ वर्षीया जेनिशा तामाङको हत्या गरेको अभियोगमा सोही ठाउँ डेरा गरी बस्ने काभ्रे धुलिखेल नगरपालिका–१० घर भएका ३० वर्षीय अमर रञ्जितकारलाई प्रहरीले पक्राउ गरेको छ ।

उनीहरूबीच आपसी विवाद भई झै–झगडा एवम् कुटपिट हुँदा गम्भीर घाइते भएकी जेनिशाको शिक्षण अस्पताल महाराजगञ्जमा उपचारको क्रममा मृत्यु भएको थियो ।

प्रहरी वृत्त लैनचौरबाट खटिएको प्रहरीले कुटपिटमा संलग्न रञ्जितकारलाई पक्राउ गरेको थियो । यस सम्बन्धनमा प्रहरीले थप अनुसन्धान गरिरहेको प्रहरीले जनाएको छ ।