माओवादीले लियो कोशी सरकारलाई दिएको समर्थन फिर्ता

विराटनगर– नेकपा माओवादी केन्द्रले कोशी प्रदेश सरकारलाई दिएको समर्थन फिर्ता लिएको छ ।

कोशी प्रदेश संसदीय दलका नेता इन्द्रबहादुर आङ्वोले हिक्मतकुमार कार्की नेतृत्वको सरकारलाई दिएको समर्थन आजैबाट फिर्ता लिएको जानकारी दिएका छन् ।

विराटनगरमा बिहान कोशी प्रदेश संसदीय दल र माओवादी केन्द्र प्रदेश कार्यालय (पदाधिकारी)को बैठकले एमालेका हिक्मतकुमार कार्की नेतृत्वको सरकारलाई दिएको समर्थन आजै फिर्ता लिने निर्णय गरेको थियो ।

यस्तै बैठकले आजै कोशी प्रदेश सरकारमा रहेका मन्त्रीहरूलाई फिर्ता बोलाउने समेत निर्णय गरेको र मन्त्रीहरुलाई राजीनामा बुझाउन निर्देशन पनि दिएको थियो ।

कोशी सरकारमा माओवादी केन्द्रका दुर्गा चापागाईँ भौतिक पूर्वाधार र जीवन आचार्य पर्यटन वन तथा वातावरण मन्त्री थिए ।

प्रदेश कार्यालयको बैठकले पार्टी प्रदेश अध्यक्ष हर्कबहादुर नेम्वाङ मिक्सोको नेतृत्वमा सरकार गठनका लागि छलफल गर्न समिति बनाउने निर्णय समेत गरेको छ ।