मुसा निकालेपछि बुद्धको जहाज काठमाडौं ल्याइयो

काठमाडौं– बुद्ध एअरले जहाजमा रहेको मुसा बाहिर निकालेर जहाज काठमाडौं ल्याएको छ ।

हिजो शनिवार जनकपुरमा रोकिएको जहाजको ट्र्यापमा आज बिहान भेटिएको मुसालाई बाहिर निकालिएको बुद्ध एअरले जनाएको छ ।

मुसा निकालेपछि जहाजलाई सम्पूर्ण जाँच गरी दुई÷तीन घण्टासम्म रनअप लिई थप सजगता अपनाइएको कम्पनीले जनाएको छ । आज दिउँसो प्रशिक्षक, चालक र प्राविधिक टोलीले जहाजलाई काठमाडौं ल्याएको छ । जहाजलाई थप निरीक्षण गरी पुनः व्यावसायिक उडान थालिने बुद्ध एअरले जनाएको छ ।

बुद्ध एअरलाइन्सले यात्रुलाई आफ्नो ब्यागेज तथा लगेजलाई राम्ररी बन्द गर्न पनि आग्रह गरेको छ । हिजो काठमाडौं उड्न ठिक्क परेको जहाजमा मुसा देखिएपछि त्यो जहाजलाई जनकपुरमै ग्राउन्डेड गरेर अर्को जहाजले यात्रु काठमाडौं ल्याएको थियो ।