पाथीभरा जाँदा हराएका पुरुष मृत फेला

काठमाडौं– झापाको अर्जुनधारा नगरपालिका–५ का लोकप्रसाद पराजुली पाथीभरा जाने क्रममा गत २२ गते बिहानदेखि बेपत्ता भएका थिए । बेपत्ता पराजुली मृत भेटिएका छन् । ६० वर्षीय पराजुलीलाई खोजतलास गर्ने क्रममा आज बिहान जंगलमा मृत भेटिएको जिल्ला प्रहरी कार्यालय ताप्लेजुङका प्रहरी नायब उपरीक्षक राजन लिम्बूले जानकारी दिए ।

लिम्बूका अनुसार माथिल्लो फेंदीदेखि करिब अढाइ÷ तीन किलोमिटर उत्तरपट्टीको जंगल क्षेत्रमा उनको शव भेटिएको हो । परिवारका सदस्यसहित पाथीभरा दर्शनका लागि गएका उनलाई माथिल्लो फेंदीदेखि मान्छेलाई पिठ्यूँमा बोकाएर लगिएको थियो ।

शौचालय जान भन्दै जंगलतर्फ पसेका उनी नफर्किएपछि खोजी भएको हो । उनको परिवार भने पूजापाठ गर्न दुई दिन अघि देखि नै मन्दिरमा रहेको पाथीभरा क्षेत्र विकास समितिका कर्मचारी राजेन्द्र महतले जानकारी दिए । उनलाई पूजा समापनको दिन पुग्ने गरी लगिएको थियो ।

उनी हराएर खोजतलास गर्दा नभेटिएपछि परिवारका कतिपय सदस्य झापा पुगेर सोमबार फेरि आएको प्रहरीले बताएको छ ।