एक दुई दिनमा मन्त्रिपरिषदले पूर्णता पाउँछ : उपप्रधानमन्त्री श्रेष्ठ

काठमाडौं – सरकारका उपप्रधानमन्त्री नारायणकाजी श्रेष्ठले आगामी एक दुई दिनभित्रै मन्त्रिपरिषदले पूर्णता पाउने दाबी गरेका छन् ।

शनिबार ललितपुर चेम्बर अफ कमर्सले गरेको कार्यक्रममा बोल्दै श्रेष्ठले मन्त्रालय बाँडफाँडको विषयमा बोल्दै आगामी एक–दुई दिनभित्रै सरकारले पूर्णता पाउने दाबी गरेका हुन् । मन्त्रालय बाँडफाँडको विषयमा गठबन्धनमा एककिसिमको सहमती भैसकेको भन्दै श्रेष्ठले अव बढीमा दुई दिनभित्रै सरकारले पूर्णता पाउने दावी गरे ।

त्यस्तै अर्थतन्त्र गम्भीर अवस्थामा रहेको र सरकारको सकारात्मक हस्तक्षेप आवश्यक भएको भन्दै उनले भने, ‘सरकारको तर्फबाट मैले तपाईहरुलाई अहिले भन्ने कुरा के हो भने सरकार यसमा गम्भीर छ । एक दुईभित्रै मन्त्रिपरिषद विस्तारले पूर्णता पाउँछ । त्यसपछाडि हामी यसबारेमा आवश्यक परामर्श सम्बन्धित सबै संस्था, निकाय र व्यक्तिहरु पनि गरेर एउटा दिशामा प्रभावकारी ढंगले कदम चाल्ने गरी अगाडि बढनेछौं ।’