मन्त्रालय भागबण्डामा प्रधानमन्त्री प्रचण्डलाई चुनौती

काठमाडौं – प्रधानमन्त्री पुष्पकमल दाहाल (प्रचण्ड)ले आगामी सोमवार विश्वासको मत लिने तयारी गरेका छन् ।

सरकारले विश्वासको मत लिए लगतै प्रधानमन्त्री प्रचण्डले सबै दललाई समेटेर मन्त्रिपरिषद् विस्तार गर्ने गृहकार्य गरेका छन् । प्रधानमन्त्री दाहालले नेपाली कांग्रेसका सभापति शेरबहादुर देउवासहित जसपा अध्यक्ष उपेन्द्र यादव र एकीकृत समाजवादीका अध्यक्ष माधवकुमार नेपाललगायत शीर्ष नेतासँग परामर्श गरिसकेका छन् । उपराष्ट्रपतिको चुनाव लगत्तै विश्वासको मत लिने र सरकार बिस्तार तयारी भएको स्रोतले जनाएको छ ।

यसअघि सत्ताघटक दल एमाले र राप्रपाले सरकारलाई दिएको समर्थन फिर्ता लिएर सरकारबाट बाहिरिएपछि अल्पमतमा परेका प्रधानमन्त्री दाहालले प्रतिनिधिसभाबाट विश्वासको मत लिने भएका हुन् । विश्वासको मत लिए लगत्तै सरकार विस्तार हुने भएको छ । राष्ट्रपति निर्वाचनमा नेपाली कांग्रेससँगको नयाँ राजनीतिक समीकरण बनेपछि एमाले र राप्रपा सरकारबाट बाहिरिएका थिए । गत फागनु १३ गते राप्रपाले सरकार छाडेको थियो भने फागुन १५ गते एमालेका मन्त्रीहरूले सामूहिक राजीनामा बुझाएका थिए । फागुन १३ देखि ३० दिनभित्र विश्वासको मत लिनुपर्ने संवैधानिक व्यवस्थाअनुसार प्रधानमन्त्री दाहालले ६ चैतमा विश्वासको मत लिने तयारी गरेका हुन् ।

प्रधानमन्त्री दाहालले ६ गते विश्वासको मत लिने तय भएको र विश्वासको मत लिएपछि मात्रै मन्त्रिपरिषद् विस्तारको तयारी गरिएको बताइएको छ ।यसअघि गत १० पुसमा प्रधानमन्त्रीमा नियुक्त भएका दाहालले २६ पुसमा प्रतिनिधिसभाबाट विश्वासको मत पाएका थिए । तत्कालीन प्रमुख प्रतिपक्षी नेपाली कांग्रेसले समेत दाहाललाई विश्वासको मत दिएपछि उनले असाधारण बहुमत पाएका थिए ।

प्रधानमन्त्रीले विश्वासको मत लिए लगतै मन्त्रिपरिषद् विस्तार गर्ने तयारी गरेका छन् । प्रधानमन्त्री पुष्पकमल दाहाल प्रचण्डको टाउकोमा अहिले १६ मन्त्रालयको भार परेको छ । नेकपा एमालेले सरकारलाई दिएको समर्थन फिर्ता लिँदै आफ्ना मन्त्रीहरू फिर्ता बोलाउने निर्णय गरेपछि प्रचण्डको टाउकोमा १६ मन्त्रालयको भार थपिएको हो । जनता समाजवादी पार्टीलाई दिन भन्दै केही मन्त्रालय खाली राखिए पनि जसपा सरकारमा सहभागी नै भएको थिएन । उसले भागबण्डामा असहमति जनाउँदै सरकारमा सहभागी जनाएको थिएन ।

प्रधानमन्त्री पुष्पकमल दाहाल ‘प्रचण्ड’ ले विश्वासको मत लिएलगत्तै सरकारलाई पूर्णता दिनेगरी गृहकार्य समेत थालेका छन् । चैत ६ गते विश्वासको मत लिएलगत्तै प्रचण्डले सरकारलाई पूर्णता दिनेगरी आन्तरिक रूपमा शीर्ष तहमा छलफल गरिरहेका छन् । अहिले सत्ता गठबन्धनमा १० दल छन् । गठबन्धनमा सामेल भएका कति मन्त्रालय लिएर कुन दल सरकारमा जान्छन् भन्ने कुरा अहिल्यै टुंगिएको छैन । तर, सरकारमा सहभागी हुँदा माधव नेपाल नेतृत्वको नेकपा एसले चार मन्त्रालयको दाबी गर्ने भएको छ । यस्तै दाबी अन्यदलहरूले पनि गर्दै आएका छन् ।

अब गठबन्धनमा दाबी गर्ने पहिलो पालो आफूहरूकै भएका नेकपा एसका नेता प्रकाश ज्वालाले बताए । उनले भने, ‘हामीले राष्ट्रपति, उपराष्ट्रपति, प्रधानमन्त्री, सभामुख र उपसभामुख सबै छाडिसक्यौँ । हामीले कडै दाबी गर्छौं । अब कति मन्त्रालय दाबी गर्ने भन्ने विषयमा पार्टीभित्र छलफल गरेर निर्णय लिन्छौँ ।’

अहिलेसम्म गठबन्धनभित्र मन्त्रालयका भागबन्डाको विषयमा छलफलले प्रवेश नपाएको उनले बताए । ‘पहिला राष्ट्रपतिको निर्वाचनमा केन्द्रित थियौँ । अब उपराष्ट्रपतिको निर्वाचनपछि प्रधानमन्त्रीले विश्वासको मत लिनुहुन्छ । अनि मात्रै भागबन्डाको विषयमा प्रवेश गर्छौं’, उनले भने, ‘मन्त्रालयको भागबन्डामा सहमति भइसकेपछि मात्रै हामी सरकारलाई पूर्णता दिने प्रक्रिया अघि बढ्छ ।’

अर्का एक नेताले कम्तीमा महत्वपूर्ण आफूहरूले रोजेकै मन्त्रालय पाउनुपर्ने बताए । ती नेताले भने, ‘पहिला छलफलमा हामीलाई चार मन्त्रालयको कुरा भएको थियो । अहिले पनि त्यही अडानमै छौँ । तर, अब गठबन्धनमा रहेका कति पार्टीहरू सरकारमा जान्छन् । त्यसमा पनि भर पर्छ ।’गृह, अर्थ, भौतिक, परराष्ट्रजस्ता महत्वपूर्ण मन्त्रालयमा आफूहरूको पहिलो प्राथमिकता रहने उनको भनाइ छ ।

गठबन्धनमा सामेल अरू दललाई पनि चित्त बुझाउन प्रधानमन्त्रीलाई सकस पर्ने देखिएको छ । संसद्मा सबैभन्दा ठूलो दल नेपाली कांग्रेस पनि सरकारमा सहभागी हुने भएकोले उसले स्वभाविक रूपमा महत्वपूर्ण धेरै मन्त्रालयमा दाबी गर्नेछ । त्यसैगरी यसअघि नै एमालसँगको गठबन्धनमा पनि असन्तुष्टि जनाउँदै सरकार बाहिर बसेको जनता समाजवादी पार्टीलाई पनि चित्त बुझाउन निकै कठिन हुने देखिन्छ । त्यसैगरी लोसपा र नमगरिक उन्मुक्ति पार्टी जनमत पार्टीलाई सरकारका सहभागी बनाउन प्रधानमन्त्रीलाई निकै सकस हुने बताइएको छ ।

सरकारले विश्वासको मत लिए लगत्तै उनले सबै दललाई समेटेर मन्त्रिपरिषद् विस्तार गर्ने गृहकार्य गरेका छन् ।प्रधानमन्त्री दाहालले नेपाली कांग्रेसका सभापति शेरबहादुर देउवासहित जसपा अध्यक्ष उपेन्द्र यादव र एकीकृत समाजवादीका अध्यक्ष माधवकुमार नेपाललगायत शीर्ष नेतासँग परामर्श गरिसकेका छन् । उपराष्ट्रपतिको चुनाव लगत्तै विश्वासको मत लिने र सरकार बिस्तार तयारी भएको स्रोतले जनाएको छ ।