नेकपा एकीकृत समाजवादीको स्थायी कमिटी बैठक बस्दै

काठमाण्डौ – नेकपा (एकीकृत समाजवादी) को स्थाई कमिटी बैठक आज बस्दैछ ।

अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) बारे छलफल गर्न आज शनिबार बिहान ११ बजे नयाँ बानेश्वरस्थीत् अर्याल होटलमा स्थाई कमिटी बैठक डाकिएको पार्टीका उपमहासचिव डा. गंगालाल तुलाधरले जानकारी दिए ।

पार्टीले आजकै बैठकबाट एमसीसीका विषयमा पार्टीको आधिकारिक धारणा सार्वजनिक गर्ने बताएको छ । यस्तै, बैठकमा देशभरको सांगठनिक गतिविधि, पछिल्लो राजनीतिक घटनाक्रमको समीक्षा, आगामी निर्वाचन लगायतका विषयमा छलफल हुने छ ।

शुक्रबार बसेको सत्तारूढ गठबन्धनको बैठकमा प्रधानमन्त्री शेरबहादुर देउवासँग एकीकृत समाजवादीका अध्यक्ष माधव कुमार नेपालले स्थायी कमिटी बैठकबाट पार्टीले एमसीसीको आधिकारिक निर्णय लिने भन्दै समय माग गरेका थिए । उनको आग्रह अनुसार प्रधानमन्त्री देउवाले आइतबारसम्मका लागि बैठक स्थगित गरेका छन् ।