दसौँ महाधिवेशनको पूर्वसन्ध्यामा ७५३ वटै पालिकामा अधिवेशन गर्दै एमाले

काठमाण्डौ – नेकपा एमालेले दसौँ राष्ट्रिय महाधिवेशनको पूर्वसन्ध्यामा आज ७५३ वटै पालिकामा अधिवेशन गर्दै छ ।

महाधिवेशनको पूर्वसन्ध्यामा आज एमालेले देशभरका स्थानीय पालिका स्तरका कमिटीको अधिवेशन गराउन लागेको हो । विशेष क्षेत्रअन्तर्गतका इलाकाको पनि एकैसाथ अधिवेशन हुनेछ। अधिवेशनको पार्टीका अध्यक्ष केपी शर्मा ओलीले पार्टीको केन्द्रीय कार्यालय, थापाथलीको वार रुमबाट दिउँसो १ बजे भर्चुअल माध्यमबाट उद्घाटन गर्ने कार्यक्रम रहेको एमाले केन्द्रीय कार्यालयका सचिव शेरबहादुर तामाङले जानकारी दिए। भर्चुअल माध्यमबाट उद्घाटन गर्ने कार्यक्रमका लागि प्राविधिकलगायत सम्पुर्ण तयारी पूरा भएको उनले बताए।

यसअघि कात्तिक ६ गते सबै वडास्तरमा अधिवेशन तय गरिएकामा अधिकांश वडामा सम्पन्न भएको छ भने बाढी पहिरो प्रभावित केही स्थानमा स्थगन भएको छ। पार्टीको नयाँ विधानबमोजिम गाउँ, नगरपालिकामा ७५, उपमहानगरपालिकामा ८५ र महानगरपालिका एक सय एक सदस्यीय कार्यसमिति निर्वाचित हुनेछ।

एमालेले महाधिवेशनमा सहभागी हुने प्रतिनिधिको मापदण्ड तय गर्न सो पार्टीले कात्तिक ११ गते स्थायी कमिटी र १२ गते केन्द्रीय कमिटीको बैठक बोलाएको छ। आगामी मङ्सिर १० देखि १२ गतेसम्म एमालेको दसौँ महाधिवेशन वाग्मती प्रदेशको चितवनमा हुनेछ। ०७७ चैत मसान्तसम्म पार्टी सदस्य भएकालाई महाधिवेशन प्रतिनिधि बन्न योग्य बनाइएको छ।