एमाले केन्द्रीय कमिटी बैठकमा माधव नेपालसहितका नेतामाथी यस्तो छ कारवाहीको तयारी

४ साउन,काठमाण्डौ – नेकपा एमालेको केन्द्रीय कमिटीको बैठक आज बस्दै छ ।

आज सोमबार बिहान ११ बजे ललितपुरको च्यासलस्थित तुल्सिलाल प्रतिष्ठानमा बैठक बस्न लागेको एमाले कार्यालय सचिव शेरबहादुर तामाङले जानकारी दिए ।

एमालेको पार्टी कार्यालय थापाथलीमा भए पनि केन्द्रीय कमिटी बैठक च्यासलमा बस्न लागेको हो । यसअघि आइतवारको स्थायी कमिटीको बैठक पनि च्यासलमै बसेको थियो । पार्टी कार्यालयका सचिव शेरबहादुर तामाङले केन्द्रीय कमिटीको सोमवारको बैठक विधान महाधिवेशनमा केन्द्रित हुने बताए ।

बैठक मूलतः पार्टीको विधान महाधिवेशनका विषयमा केन्द्रित हुने भएपनि आइतबार प्रतिनिधि सभामा पार्टीको निर्देशन विपरीत प्रधानमन्त्री शेरबहादुर देउवालाई विश्वासको मत दिने सांसदका विषयमा पनि छलफल हुने पार्टी कार्यालयका सचिव तामाङले जानकारी दिए । एमालेका २२ जनाले देउवालाई विश्वासका मत दिएका थिए भने १० जना तटस्थ बसेका थिए ।

विश्वासको मत दिने र तटस्थ बसेकाहरुलाई एकैखाले व्यवहार नहुने तामाङको भनाइ छ । सोमबारको स्थायी कमिटी बैठकले देउवाको पक्षमा मत दिनेहरु एमालेमा नरहने निर्णय गरेको थियो ।

तर, संविधानको धारा ७६ (५) को सरकारलाई विश्वासको मत दिँदा ह्वीप नलाग्ने र त्यसैआधारमा कारबाही गर्न नपाइने सर्वोच्च अदालतले फैसला सुनाएकाले उनीहरुलाई अरु नै कारण देखाएर कारबाही गर्ने तयारी एमालेको छ । ‘विश्वासको मत दिए/नदिएको विषयमा कारबाही नहोला तर अन्य विषयमा कारबाही हुन्छ,’ तामाङले भने, ‘आज प्रक्रिया पुर्‍याएर अगाडि बढ्छौँ ।’