एमाले ओली पक्षले बोलायो स्थायी कमिटी बैठक : कार्यदल अन्यौलमा

२७ असार,काठमाण्डौ – नेकपा एमाले ओली पक्षले स्थायी कमिटीको बैठक बोलाएको छ ।

एमाले पार्टी एकताका लागि सहमति हुन ढिलाइ भइरहेका बेला अध्यक्ष एवं प्रधानमन्त्री केपी शर्मा ओलीले पक्षले स्थायी कमिटी बैठक बोलाएको हो । बैठक आज साँझ ४ बजे बस्नेगरी बोलाईएको एमाले नेता शेरबहादुर तामाङले जानकारी दिए ।

एमालेभित्रको विवाद मिलाउनका लागि गठित कार्यदलको बैठक सिंहदरबारमा जारी रहेकै बेला एमालेका अध्यक्ष केपी शर्मा ओली पक्षले स्थायी समितिको बैठक बोलाउनुलाई अर्थपूर्णरुपमा हेरिएको छ ।

यसअघि, कार्यदलले तयार गरेको सहमतिको मस्यौदालाई एमालेका वरिष्ठ नेता माधवकुमार नेपालले अस्वीकार गरेका थिए । मस्यौदामा सर्वोच्च अदालतमा विचाराधीन मुद्दालाई प्रभावित पार्ने शब्दावली राखिएको भन्दै माधव नेपालले फिर्ता पठाइदिएका हुन् । नेपालले असहमति जनाएपछि सहमतिका लागि कार्यदल सदस्यहरु अहिले पुनस् छलफलमा छन् ।​

एमालेका दुई पक्षबीच आज नै सहमति हुने नेताहरुले दाबी गरे पनि पार्टीभित्रको विवाद झनै पेचिलो बन्दै गएको छ ।