गुण्डा नाईके गणेश लामा पक्राउको विरोधमा बनेपामा प्रदर्शन

२८ जेठ,बनेपा – बिहिवार पोखरामा पक्राउ परेका गुण्डा नाईके गणेश लामाको रिहाईको माग गर्दै काभ्रेको बनेपामा बिरोध प्रदर्शन भएको छ ।

शुक्रबार, नेपाल विद्यार्थी संघ काभ्रेको संयोजनमा बनेपाको चारदोबाटोमा प्रदर्शन गरिएको हो । प्रदर्शनकारीले लामालाई निशर्त रिहा गर्न माग गरेका छन् । उनीहरूलाई प्रहरीले धरपकडसमेत गरेको थियो ।

बनेपासहित काभ्रेका विभिन्न स्थानमा प्रदर्शन गरिएको र थप आन्दोलनको तयारी भइरहेको नेविसंघ काभ्रेका नेता रविन गौतमले जानकारी दिए ।

पोखरामा पक्राउ परेका लामा नेपाली कांग्रेसका तर्फबाट गत प्रदेशसभा निर्वाचनमा काभ्रेमा नेपाली काँग्रेसबाट प्रदेशसभा सदस्यको उम्मेदवार रहेका थिए ।