२०७९ चैत्र १४, मंगलबार

यी प्रश्नले घेर्दछ

भरत राज पौडेलप्रकाशित मिति: २०७७ माघ २७, मंगलबार (२ साल अघि)

११३४ पाठक संख्या

bharat paudel

१. को पो रून्छ अनादिदेखि छ यही सम्बन्ध छुट्दै रहे

पर्दा रात त सूर्यका किरण ती हुन्नन् नि साथी छुटे।

जन्मेको दिनबाट मृत्युतकको नाता हुने हो जहाँ

को सम्झन्छ र फेरि यो भुवनमा फर्कन्छ को पो यहाँ!

२. बाँचेको क्षण सत्यबोध म गरूँ संसार यस्तै छ यो

चल्छन् स्वार्थविशेषले सबजना राखूँ सधैं चेत यो।

जो जो सत्त्वविषे प्रतिष्ठित हुनन् छन् मानवीमूल्यका

आफ्नो स्वार्थनिमित्त कर्मरत जो हुन्छन् रजोधर्मका!

३. यो कालो कलिमा तमोगुणमुखी मान्छे अनेकेोँ हुनन्

साँच्चै निर्मम दानवी प्रवृत्तिका मान्छेहरू धेर छन्!

सत्तास्वार्थविषे छ चाख जसको सेवा कहाँ गर्छ त्यो

अल्छी हो निदमोहको वश हुने कस्को दया गर्छ त्यो?

४. कर्मैका चलखेल छन् सब दिशा छन् मोहमायाहरू

साथीभाइसमेत निश्छल कतै भेटिन्न को छन् अरू!

पत्नीपुत्रविषे छ मोहममता तिन्का निजी चाल छन्

श्रद्धा शेष कहाँ हुने कलिविषे सम्बन्ध नै नेल छन्!

५. देखी हिंस्रक राज्यशासक झनै वैराग्य पो लाग्दछ

मान्छे निम्न झनै कठोर किन भो यी प्रश्नले घेर्दछ ।

को प्यारी ? भवमोहिनी! दिलविषे खै प्रीतिको भावना !!

को साथी? निज स्वार्थबाहेक कुनै छैनन् कतै गुञ्जन।।

६. जीवात्मा! अब ता यतै हृदयको साथी बना बेस छ

मायमोहसिवाय भेटिन कतै रोऊँ सधैं ?व्यर्थ छ!

मुर्दादेह रहेछ लत्रन स्वयं तैयार यो गर्दछ

देहैका जति छन् जहाँ जति थरी सम्बन्ध के टिक्तछ??

शार्दूलविक्रीडित छन्दमा

भरत राज पौडेल

यी प्रश्नले घेर्दछ

शार्दूलविक्रीडित छन्द

प्रतिक्रिया दिनुहोस

Subhayug Media Pvt. Ltd.

नयाँबानेश्वर काठमाण्डौ, नेपाल

[email protected]

01-5705310

सुचना तथा प्रशारण बिभाग दर्ता नं. : - २८३२ - ०७८/७९

हाम्रो टीम

Editor-in-Chief :
Bibek Aryal 9841065149

Desk Editor : Haribahadur Baniya
: Bikash Rauniyar