२०८२ अषाढ ४, बुधबार

‘ओलीको रवैयाले गर्दा ‘राजा आउ देश बचाउ’ भन्ने नारा लाग्यो’ : शेरबहादुर देउवा

शुभयुग संवाददाताप्रकाशित मिति: २०७७ मंसिर २९, सोमबार (४ साल अघि)

१०१४ पाठक संख्या

२९ मंसिर,हेटौंडा – नेपाली काँग्रेसका सभापति शेरबहादुर देउवाले प्रधानमन्त्री केपी ओलीको रवैयाले गर्दा ‘राजा आउ देश बचाउ’ भन्ने नारा लागेको बताएका छन् ।

आज (सोमबार) मकवानपुरको हेटौंडामा आयोजित नेपाली काँग्रेसको विरोधसभालाई सम्बोधन गर्दै उनले अहिले कम्युनिस्ट सरकार र त्यसका प्रधानमन्त्री केपी ओलीको रवैयाका कारण सडकमा ‘राजा आउ देश बचाउ’ भन्ने नारा लागेको आरोप लगाएका हुन् ।

त्यस्तै देउवाले सरकारका गलत कार्यशैलीका कारण काँग्रेस आन्दोलनमा होमिनुपरेको बताए । उनले लोकतन्त्रको रक्षाका निम्ती काँग्रेसले देशभर प्रदर्शन गरेको पनि बताए । त्यस्तै देउवाले कम्युनिस्ट सरकारबाट जनता दिक्क भएको समेत बताएका छन् । ‘अहिले राजा आउ देश बचाउ भन्दै सडकमा हिँडेको देखिन्छ । यो किन भयो रु यो पनि कम्युनिस्ट सरकार र ओलीकै कारण भएको हो’, पूर्व प्रधानमन्त्री समेत रहेका देउवाको भनाई छ । उनले कम्युनिस्टहरुले एकदलीय सर्वसत्तावादी शासन लागू गरेको भन्दै कोरोनाको औषधी उपचार गर्नुपर्ने सरकार भ्रष्टाचारमा लिप्त भएको आरोप लगाए ।

उनले कोरोनामा पनि घुस खाने काम सरकारका जिम्मेवजार व्यक्तिहरुले गरेको तथा हत्या र बलात्कारमा संलग्नहरुलाई कारवाही गर्नुको साटो सरकारले नै संरक्षण गरेको बताए । ‘कञ्चनपुरकी बालिकाको बलात्कार गर्नेलाई पक्राउ गरेको छैन । पार्टीको संलग्नता छैन भने किन वलात्कारीलाई यो सरकारले पक्रेन ?’ देउवाले प्रश्न गरेका थिए ।

त्यस्तै देउवाले आफुले चुनावताका कम्युनिस्टले जिते रुन पनि नपाइने भनेको प्रसंग कोट्याउदै अहिले त्यस वेलाको भनाई प्रमाणित भएको दावी समेत गरे ।